Land's End, que en galego significa «fin da terra» ou «fisterra» (en córnico, Penn an Wlas), é un cabo e pequeno asentamento no oeste de Cornualla, Inglaterra. Atópase na península de Penwith aproximadamente a 13 quilómetros ao oeste-suroeste de Penzance.
Land's End é o punto máis occidental da illa de Inglaterra. Os Longships, un grupo de illotes rochosos, quedan xusto a unha milla fronte á costa. As illas Sorlingas quedan aproximadamente a 45 quilómetros ao suroeste de Land's End. A mítica terra perdida de Lyonesse (como se chama na literatura artúrica) atopábase, supostamente, entre as Sorlingas e a illa principal.
Land's End ten unha resonancia particular debido a que normalmente se usa para suxerir distancia. De Land's End a John ou' Groats, en Escocia, hai unha distancia de 1349 km por estrada e define a lonxitude de estradas, camiños ou eventos de caridade.
